bootwear

Loksins er ég búinn með ritgerðina sem ég byrjaði á fyrir viku síðan. Ekki það að ég sé búin að sitja sveittur átta tíma á dag í heila vikur, heldur vinn ég afskaplega hægt. Það er ótrúlegt hvað ég get verið lengi að koma mér í ritgírinn og það er enn ótrúlegra hvað hann varir stutt. Ég hlýt hreinlega að vera með athyglisbrest.

Annars fjallaði ritgerðin um ólguna í Mið-Austurlöndum, sem er nú áhugavert efni út af fyrir sig og eitthvað sem maður heyrir um í fréttum á hverjum degi. Það litla álit sem ég hafði á Bush og utanríkisstefnu hans hvarf hins vegar algerlega eins og dögg fyrir sólu. Þeir eru hreinlega með puttana í öllum málum allra landa, annað hvort með óbeinum eða beinum hætti. Magnaðir andskotar þessir kanar. Það er ótrúleg hræsni að ráðast inn í lönd eins og Afganistan og Írak til að stuðla að lýðræði í heiminum eins og þeir segja, en eru svo "bestu vinir aðals" í Sádí-Arabíu og Egyptalandi, sem eru mestu einræðisríki í heiminum. Þar mega menn ekki prumpa á almannafæri án þess að vera drepnir. Sennilega þess vegna sem þeir nenna ekki að skipta sér af því. Það er náttúrulega engin ólga í þessum löndum, vegna þess fólkið má ekkert og veit ekkert, annars er það bara grýtt til dauða eða guð má vita hvað…Já og svo eiga Sádarnir náttúrulega ¼ af allri olíu í heiminum.

Ætla nú ekki að fara nánar út í þetta þar sem stjórnarandstæðan hér á landi er búin að sjá til þess að landsmenn eru komnir með grænar bólur af þessum umræðum um innrásirnar í Afganistan og Íran og hvað þá þessum blessaða lista, sem Dabbi og Dóri skrifuðu undir. Heyrði einhverja konu vera að tuða yfir listanum í fréttum alveg bálreið. Allt í lagi að nefna afleiðingarnar af þessum stríðum, þ.e.a.s. borgarastyrjaldir og allt það, en í guðanna bænum sleppið þessum lista. Það er orðið hálf kjánalegt. Ég held líka að stjórnarandstæðan ætti fjalla um eitthvað sem skiptir máli fyrir nútímann og framtíðina í stað þess að vera að velta sér endalaust upp úr þessu.

Það er líka svo stutt síðan þeir gerðu sig að fífli með þessa klámráðstefnu, vildu fara að ræða það sérstaklega á Alþingi þótt nokkrir klámhundar komi til landsins.

Spurning hvort VG hefðu látið loka landinu ef þeir hefðu verið í ríkisstjórn

Ég hef mikið verið að spá í hvaða flokk ég ætli að kjósa í komandi Alþingiskosningum, en kemst bara ekki að niðurstöðu. Ef kosið yrði á morgun held ég að ég myndi skila auðu, eða einfaldlega sleppa því að gera mér ferð á kosningastað. Gefa bara skít í þetta. Leyfa öllum að hneykslast á því hvers vegna ég nýti ekki minn lýðræðislega rétt og hvort mér sé alveg sama um lýðræðið, hvort ég sé kannski bara anarkisti og allt það.

Fékk þessa romsu yfir mig frá ákveðnum samnemenda mínum í stjórnmálafræðinni þegar ég tjáði þeim að ég hefði bara gleymt að kjósa í háskólakosningunum um daginn. Að sjálfsögðu var það lygi, því ég einfaldlega nennti ekki að kjósa.

Annars sá Vaka um að minna mig á kosningarnar með 5 mínútna millibili með sms-um og símhringingum, þannig að ég hefði svo sem aldrei getað gleymt þeim. Ég þarf varla að taka það fram að flestir þeir sem bjóða sig fram fyrir Vöku eru bláir í gegn og allir vita hvað Sjálfstæðismönnum finnst gaman að hringja í fólk á elleftu stundu til að gá hvort þeir séu ekki örugglega búnir að kjósa og hvort þeir hafi ekki kosið "rétt". Buðust meira að segja að ná í mig á Selfoss og keyra mig í bæinn, hefði átt að leyfa þeim að koma og gefa þeim vitlaust heimilsfang og slökkva svo á símanum.

En ef ég vík aftur að alþingiskosningunum þá finnst mér það vera bull að það sé miklu betra að skila auðu, heldur en að spara sér bara ferðina og sleppa því að mæta, því það kemur út á eitt. Finnst eitthvað kjánalegt við að keyra á kjörstað, bíða í biðröð eftir því að komast í kjörklefann ef maður ætlar sér aldrei að kjósa neinn hvort sem er. Ef auðu seðlarnir myndu hins vegar hafa einhver raunveruleg áhrif þá myndi þetta horfa öðruvísi við.

Ég legg til að málið verði sett í nefnd og aðum kjörseðlum verði fundið eitthvert gildi. T.d. ef auðir seðlar færu yfir 50%, eða væru fleirri en öll atkvæði stærsta flokksins þá ætti engin flokkur að komast til valda og einhver málamiðlun yrði fundinn, kannski eitthvert sérfræðingaveldi. Þetta fyrirkomulag myndi allavega ýta á flokkana til að þjóna fólkinu sem best. 

Annars er best að ég hætti núna, er orðið helv... langt og leiðinlegt blokk, langaði bara að koma þessari hugmynd á framfæri áður en einhver annar stelur henni og verður frægur